Kurteislegt brjev til kanselísins

2011-12-16T09:20:00.002Z

Má grey sendiráðskallinn ekki fá búslóðina sína bætta? Af hverju þykir þetta svona svakalega fréttnæmt? Alltaf verið að stinga á kýlum í fréttunum?

2011-11-01T22:12:00.000Z

Bankaþankaskrifarinn Davíð slær sífellt í gegn. Það er greinilegt hvar kristnu kærleiksblómin spretta. O sei sei, o já.

Annars er athyglisvert hvernig hótun um málssókn breytir rökræðum.

2011-10-28T21:39:00.000Z

Ég man eftir lögmanni Öryrkjabandalagsins sem þótti ægileg mannréttindahetja. Gott ef fólk hafi ekki viljað sæma hann Fálkaorðunni. Hann er auðvitað enn við sama heygarðshornið. Nú síðast flutti hann mál fyrir hönd þýska banka og svokallaðra vogunarsjóða þar sem hann hélt því m.a. fram að brotið hefði verið gegn eignarétti þeirra. Heyrði nú ekki í honum í fréttunum en þetta hlýtur að vera mál fyrir þá í Strasbourg.

2011-10-20T09:42:00.000Z

„Vöðvafjallið og sjónvarpsmaðurinn Egill Einarsson hefur dvalið á Benidorm undanfarna daga í góðu yfirlæti. Þar hafa staðið yfir tökur á nýrri sjónvarpsþáttaröð, Lífsleikni Gillz, þar sem hann kennir Íslendingum hvernig þeir geta orðið sannkallaðir heimsborgarar.“
- DV.is

Heimsborgarar á Benidorm. Frekar gott grín. Lengi er von á einum!

2011-10-18T15:00:00.001Z

Ef ég væri ekki soddan amatör væri íslensk listasaga eflaust gríðarleg vonbrigði. Það er að minnsta kosti hægur vandi að finna á henni margvíslegan löst. Umfjöllun er oft endurtekin og í þessu yfirlitsriti koma stundum fyrir smáatriði sem eru algjörlega gagnslaus (sbr. að að Ásgrímur Jónsson mundi ekki mörgum árum seinna í hvaða danska listasafni hann sá van Gogh mynd). Þetta ætti víst að skrifast á ritstjórn. En bókin er svaka flott.

2011-08-23T08:03:00.001Z

Nú hefur maður heyrt þá skilgreiningu á feminisma að feministi sé sá sem skilji laka stöðu kvenna og vilji gera eitthvað í því. Nokkuð rúm skilgreining sem rúmar m.a.s. frekar borgaralega feminista. Tobba Marínós kemur svo sterk inn sem feministi nema hvað hún misskilur seinni hlutann. Þennan með aðgerðirnar. Hún vill nefnilega bara græði á því.

2010-12-01T08:27:00.000Z

„Dagur B. Eggertsson, formaður borgarráðs, var spurður hvort hann óttaðist ekki að auknar álögur myndu ýta undir samdrátt. „Auðvitað höfum við áhyggjur af því hvernig fjölskyldur standa og þess vegna höfum við vandað mjög til samsetningar á þessum aðgerðum,“ er haft eftir Degi í Morgunblaðinu“
Eyjan.is

Það er svo gaman að geta varpað svona fram í þeirri vissu að enginn blaðamaður mun nokkurn tíman óska eftir því að fá að vita hversu vandað þetta er. Liggur t.a.m. fyrir hversu mikill tekjusamdráttur verður í sorpi við hækkun sorphirðugjalda? hversu margir munu hætta að vinna vegna aukins kostnaðar við dagvistun? Hversu miklum sparnaði megi ná með sameiningum leikskóla? Ég er handviss um að hr. Eggertsson hafi ekki látið fara fram neina úttekt á þessu. Hann hefur líklega ekki einu sinni spurt bróðir sinn sem þó mælti sérstaklega með ákveðnum aðgerðum í fjármálum Reykjavíkur. Aðgerðum sem meirihlutinn kýs að ráðast ekki í. Sem segir manni auðvitað að helsta kosningarloforð samfó hafi bara verið froða sem hagfræðidoktor í útlöndum var fenginn til þess að hrósa í plati (rubberstamp kallar kaninn þetta).

Og hvað er þetta með sparnaðinn af sameiningum leikskóla. Almennt næst stærðarhagkvæmni fram með því að meðalkostnaður á framleidda einingu lækkar af því að einhverjum kostnaðarlið þarf ekki að breyta við stærðaraukninguna. Dæmi: það er hægt að hafa jafn marga fjármálastjóra í fyrirtæki sem framleiði 80 vörur og fyrirtæki með framleiðir 90 vörur. Ég bara sé þetta ekki gerast í leikskólum.

2010-11-29T09:45:00.000Z

Gaman. Stúdentar eru svo æðislegir en þessir kennarar ekki alveg nógu góðir. Það er alveg óþarfi að nemendur hagi sér vel í tímum eða geri annað en þeim sýnist. Það er auðvitað hluti af akademísku frelsi nemenda að spila Bubbles í tímum. Sjálfsagt mál.

Afstaða stúdentaráðs til náms er eiginlega alveg furðuleg. Ráðið hefur engan áhuga á því að fólk læri, að háskólinn sé akademískt sterk stofnun né nokkru öðru sem sem almennt þykir æskilegt að einkenni háskóla.

Og svo baðst kennarinn afsökunar. Nær hefði verið að rektor hefði fyrirskipað að loka yrði fyrir aðgang að Bubbles á háskólasvæðinu og allir felldir í áfanganum.

2010-11-19T14:47:00.000Z

Lítið hér. Svaka fínn bæklingur.

2010-10-25T10:18:00.000Z

Vægari leið en blátt bann við kirkjuátroðningi væri sú að breyta default valmöguleikanum. En í hvert sinn sem til stendur að gera kirkjudót í skólum þá þurfa foreldrar að segja nei takk ef þeir vilja hlífa börnum sínum. Það er auðvitað fargmalt sanngjarnara að snúa dæminu við og gera þeim sem vilja neyða börn í sálmagól að óska eftir því.

En hvað er málið með samfélag sem nennir að vera heltekið af banni við heimsóknum Gideon-félagsins í grunnskóla? Svo bara sé litið til borgarmálanna þá liggur fyrir að Reykjavík hyggist skera gífurlega niður þjónustu við börn. En menn æsast allir upp þegar Gideon-félagið fær ekki að gefa Nýja testamentið. Mitt er ólesið upp í hillu ennþá tuttugu árum síðar.„Já nú get ég ekki orða bundist. Nú skrifa ég sko í blöðin. Ekkert Gideon! Það væri allteins hægt að leggja af samfélagið."

Nýja Ísland er málefnalegt og upplýst.

2010-10-12T10:12:00.002Z

Það er svo miklu fréttnæmara að Skotar spili 460 en að manure spili 460.

2010-06-09T19:31:00.002Z

Í sveitastjórnarlögum fann ég orðið framboðsaðili. Það er hugsanlega ljótasta orðið á íslenskri tungu.

2010-06-07T16:01:00.000Z

Jafnréttisstofa telur samvizkusamlega konur og karla í sveitastjórnum. Er það vel. Á heimasíðu sinni birtir stofnunin svo graf með hlutfalli beggja kynja. Það skemmtilega er að með því að plotta bæði kynin verður grafið augljóslega að reðurtákni. Sem er góður húmor.

2010-05-15T15:58:00.000Z

Hver af eftirtöldum er raf- og múrverktaki:
1. Ergo
2. Logos
3. Enorma
4. Advel

2010-05-08T10:37:00.000Z

Það er auðvitað ljótt að segja það en maður veltir því fyrir sér hvort Ólafur eff hafi valið þessar fjórar konur í sæti 2. til 5. af því að þær eru einhleypar?

Annars veit ég ekkert um hjúskaparstöðu þeirra.

2010-04-13T22:16:00.002Z

Er það bara af því að Drogba er orðinn 32 ára sem hann er AC Milan hefur áhuga á honum?

Það styttist nefnilega í að ég fari sjálfur að reskjast.

2010-04-13T14:36:00.002Z

Ásdís Rán alltaf með puttann á púlsinum. Annars les ég aldrei Pressuna.

2010-04-13T12:28:00.000Z

Svona til framtíðar má auðvitað spyrja hvort Basel reglurnar séu ekki bara rugl. Já eða bankar og kapítalistar. Kannski var framsóknarflokkurinn bara með þetta þegar hann lagði ofuráherslu á samvinnuhreyfinguna.

Djók.

Altso sambandið. Sambandið var djók.

Nú var það nokkuð ljóst að lausafjárgnóttin var ólíkleg til þess að vara. Og að munurinn í tímalengd fjármögnun og útlánum er eitt af þeim höfuðatriðum sem hafa þarf áhyggjur af í bankarekstri. Getur það flokkast undir annað en barnaskap að byggja bankarekstur á því að gefa út stutta pappíra t.þ.a. lána langt?

Og það er auðvitað sök sér að lána. En man einhver hvaða fjárfesting snillingaliðsins skilaði hagnaði? Og ef hún skilaði hagnaði var það þá ekki af því að fjárfestingin var seld öðrum snilling?

Man einhver eftir þessari laxveiðiferð? Björn Ingi (sem er að hreinsa nafn sitt) og Guðlaugur Þór, Vilhjálmur Þ. Vilhjálmsson, þáverandi borgarstjóri og Haukur Leósson, þáverandi stjórnarformaður OR. Þess má til gamans geta að Gulli var með Ólafi Stephensen, Ara Edwald og Jónasi Fr. í stjórn sus. Ef maður bætir við þetta styrkjunum frá Baugi þá má vel sjá ákveðið mynstur í þessu.

Stundum þá hvarflar það að þróun mannsins hafi ekki heppnast alveg sem skyldi. Það virðist vanta eina eða tvær stökkbreytingar.

2010-04-08T22:53:00.000Z

ESB heilaþvottur. Gaman. Ég er alveg til í eina svona heilaþvottarferð. Helst um mitt sumar. Já, og kannski OECD heilaþvottur væri skemmtilegri en ESB-neskur.

2010-04-05T12:09:00.000Z

Jú, þú sem átt ef til vill erfitt með að trúa frásögnum guðspjallanna um upprisu hins krossfesta, þú mátt vita, að þær frásagnir tákna aldrei neitt minna en von um réttlæti, að þjáningin og sorgin, hatrið og mannvonskan, siðspillingin, svikin og ranglætið og dauðinn munu ekki hafa síðasta orðið.
- hr. Karl Sigurbjörnsson

Nú trúi ég ekki frásögnum guðspjallanna en þetta talar bara ekkert við mig. Reyndar fannst mér þetta fyndið. Sem var líklega ekki ætlunin. Síðasta orðið verður líklega heróp við Harmageddón. Á heimsslitaboðskapur virkilega erindi við þá sem eiga erfitt með að trúa frásögnum guðspjallanna? Er ekki einfaldara að plata fólk fyrst með einhverju einföldu, eins og að mannvonska syndaflóðsins hafi merki von og eitthvað fleiri krúttlegt?

2010-03-29T08:23:00.000Z

Hvernig getur það gengið upp að stærsti hluthafi dagblaðs sem jafnframt er ritstjóri ætli að tryggja skýran aðskilnað á milli ritstjórnar og eigenda?

Í besta falli kemur ritstjórinn í veg fyrir áhrif hinna hluthafanna. Sem er nú öllu líklegra markmið hjá Reyni Traustasyni.

2010-03-18T11:25:00.000Z

Í fyrsta og eina sinn sem ég hlustaði á nýjan fréttaskýringaþátt á samtengdum rásum ríkisútvarpsins komst ég að því að engin íslensk kona væri nunna í karmelluklaustri og eitthvað væru um ryð á bátum.

Ætli þetta fólk stoppi aldrei og hugsi "erum við ekki alveg örugglega að gera rétt?"

2010-03-09T12:14:00.000Z

Hvernig er hægt að sleppa því að túlka niðurstöður þjóðaratkvæðagreiðslunnar á blogginu sínu? Það er alveg ljóst að landsmenn eru hlynntir stofnun lýðveldis á Íslandi. Djók, það var í öðrum kosningum þar sem enginn kaus á grundvelli þess að Jóhanna eigi ljótar blússur eða að Ólafur Thors reyki vitlausa vindlategund.

Hún er sniðug fléttan hjá samfylkingunni að gera lítið úr þessu öllu á grundvelli þess að kosningin uppfylli ekki einhver lýðræðisskilyrði. Af því tilefni má reyndar velta vöngum yfir því hvort hægt sé að kjósa um kvótakerfið. Líklega þyrfti fyrst að kjósa um grundvöll veiðitakmörkunar. Það mætti gera með þessari spurningu:

1) Hvernig á að takmarka fiskveiðar?
a) Með aflakvóta
b) Með sóknarstýringur
c) Með boðum og bönnum

Svo þyrfti líklega að hafa aðra atkvæðagreiðslu og spyrja nýrrar spurningar um útfærsluna. Hún gæti verið svona (að því gefnu að kostur a vinni):

2) Hvernig á að útfæra kvótakerfið?
a) Úthluta skal aflaheimildum á grundvelli aflahlutdeildar þar sem allt er óframseljanlegt
b) Úthluta skal aflaheimildum á grundvelli aflahlutdeildar þar sem aflaheimildir eru óframseljanlegar
c) Úthluta skal aflaheimildum á grundvelli aflahlutdeildar þar sem aflahlutdeildir eru óframseljanlegar
d) Úthluta skal aflaheimildum á grundvelli aflahlutdeildar með fullum framseljanleika hvors fyrir sig en forkaupsréttir sveitarfélaga
e) Úthluta skal aflaheimildum á grundvelli aflahlutdeildar en gera ráð fyrir byggðakvóta
f) Úthluta skal aflaheimildum á grundvelli uppboðs
g) Úthluta skal aflaheimildum á grundvelli uppboðs þar sem aflaheimild er óframseljanleg
e) Úthluta skal aflaheimildum á grundvelli aflahlutdeildar
f) Úhluta skal óframseljanlegum aflahlutdeildum til allra Íslendinga

Svo eru reyndar fleiri kostir. Ég gleymi t.a.m. alveg línuívilnun og þeirri norsku hugmynd að banna framsal á milli byggðalaga. Ætli það þyrfti ekki einhvers konar raðval eða sjóðval til þess að kjósa á milli þessara kosta. Mjög einfalt allt saman. Og varla þarf að hafa áhyggjur af því að menn velji á grundvelli ómálefnalegra sjónarmiða í svona kosningum?

2010-02-22T10:35:00.000Z

Hver ákvað að framhjáhald Tiger Woods væri svo merkilegt að það þyrfti alltaf að birtast í íþróttafréttum aðalfréttatíma íslenskra sjónvarpsstöðva en framhjáhald John Terry væri svo ómerkilegt að það ætti ekki einu sinni að minnast á það?

Já, og hula alvöru fréttamennsku er nú ansi þunn þegar menn stelast til þess að setja kynlífsfréttir í íþróttirnar.

2010-02-17T10:40:00.000Z

Nú er Bayer 04 Leverkusen á toppi þýsku deildarinnar. Þar þekkir maður þó engan leikmann annan en Sami Hyypia. Hann hlýtur því að vera nóg til þess að vinna deildina einn og sér. Enda búinn að spila í áratug með Liverpool.

2010-02-11T12:56:00.000Z

Þessi ágæta mynd sem ég fann í ársskýrslu Rúv er skemmtileg. Það kemmur líklega engum á óvart að Rás 2 einkennist af dægurtónlist og sendir ekki út neitt vísinda- og fræðsluefni. Það er skömm að því.

Sambærileg tafla fyrir Bylgjuna þyrfti líklega að innihalda dálkinn „Fliss“.

2010-02-06T13:05:00.002Z

Í dag er góður dagur til þess að kjósa Líf Magneudóttur í annað sæti í forvali vinstri grænna í Reykjavík.

2010-02-01T11:27:00.000Z

Öllum betri spæjarasettum fylgir stækkunargler. Enda eru stækkunargler góð skemmtun og nauðsynleg hverjum spæjara. Eigi að síður man jeg ekki eftir einni einustu spæjaramynd þar sem stækkunargler kom við sögu.

Í æfintýrum Enid Blyton voru stækkunargler almennt notuð af hugvitssömum krökkum t.þ.a. kveikja eld. Það ættu e.t.v. að vera eldfæri í spæjarasettum.

2010-01-31T00:30:00.000Z

Fullt af sparnaðarráðgjöf keypt af Capacent segir nú í fréttum. Það er skemmtileg íronía í því að jeg man ekki eftir að hafa sjeð þetta verkefni boðið út en útboðsskylda myndast við kaup á verkum og þjónustu við 10 milljónir króna.

2010-01-28T08:38:00.000Z

Merkilegt hvað það er algengt að samfylkingarfólk sem lætur prenta út mannhæðarháar myndir af sér skuli ekki tíma því að kaupa sér lén. M.a.s. menn sem splæsa í mynd af sjer hjólandi í spandexgalla.

Ef ég hefði nógu stóran glugga á heimili mínu væri jeg auðvitað fyrir laungu búinn að koma mjer upp svona mynd.

2010-01-24T09:31:00.000Z

„Það fer auðvitað eftir samsetningu þeirra sem mæta til leiks. Líka eftir því hvort einhver smölun hafi verið í gangi en ég geri mér ekki grein fyrir því hvort svo hafi verið.“
- Marta Guðjónsdóttir eftir prófkjör sjálfgræðisflokksins

Frambjóðandinn Marta er hugsanlega eini maðurinn á íslandi sem velkist í vafa um það hvort smalað hafi verið í prófkjöri sjálfgræðisflokksins. Kosningamiðstöðvarnar þjónuðu vitaskuld fyrst og fremst þeim tilgangi að sýna borgarbúum öllum fram á einstaka færni prófkjörsframbjóðenda í vöfflubakstri og kaffiuppáhellingum án atrennu.

2010-01-23T09:42:00.000Z

Jæja, mjer datt í hug varðandi kostnaðarvitund og sparnað og svona að það væri mjög sniðugt að prenta á peningaseðla hvað það kostar að prenta þá. Fólk myndi þá hugsa "já, það er svona dýrt að prenta seðla, best að geyma hann í formaldehýði þangað til jeg þarf að nota hann". Þá myndi ending seðla kannski fara úr þremur í fimm ár.

2010-01-22T10:24:00.000Z

Sjónarmið mín um að handbolti sje leiðinlegur og ómerkilegur hafa sjaldan fallið í jafn góðan jarðveg og einmitt í dag. Hvað skyldi valda því?

2010-01-21T12:25:00.000Z

Sú staðreynd að mótmælendur og ýmis minni spámenn sjeu helst sóttir til saka eða undir rannsókn í kjölfar bankahrunsins leiða mann ósjálfrátt til þess að draga vissar ályktanir sem sumar stangast hver á við aðra:
1) Kapítalisminn lætur ekki að sér hæða. Lítilmagninn fer í steininn á meðan burgeisarnir skemmta sjer.
2) Íslenskri bankamenn voru bara frekar heiðarlegir þegar allt kemur til alls
3) Íslenska réttarkerfið ræður ekkert við alvöru mál

Nema handhafar ákæruvalds séu bara að vanda sig ofurmikið til þess að lenda ekki í öðru baugsmálsklúðri.

2010-01-18T11:55:00.000Z

Merkilegt hvað þessir útlendingar eru uppteknir af klámi. En það er nú gott að það er ekkert slæmt að gerast í veröldinni!

2010-01-16T15:39:00.000Z

Sveina geir í svanna hólmi.

Af hverju hefur Mörður Árnason ekki ennþá tjáð sig um það að einungis eitt af lögunum í forkeppni RÚV fyrir júróvisjón sje á íslensku (m.v. nöfnin altso)? Er hann ekki á landinu?

2010-01-15T10:29:00.000Z

Facebook heitir vefsíða sem nýtur gífurlegra vinsælda. Reglulega býður hún manni að gerast „fan“ eins eða annars. Það er auðvitað ekki hægt að bjóða vel meinandi broddborgunum í Vesturbænum upp á svona ósóma.

2010-01-14T09:17:00.002Z

Ætli það sé ekki svona mánuður í það að maður upplifi dag þar sem enginn minnist á Avatar.

2010-01-13T16:04:00.000Z

Þetta Avatar-dæmi er komið út fyrir allan þjófabálk. Í gamla daga voru til svona blokkbuster myndir sem margir fóru að sjá og höfðu gaman af. Nú er allt í einu bara einn mega-blockbuster sem allir bókstaflega verða að sjá. Að hafa ekki áhuga á að sjá Avatar er jafnvel álitið merki um andfélagslega hegðun og maður mætir alls konar félagsmótunarþrýstingi. Gagnrýnendur á Rás 1afsökuðu sig m.a.s. um daginn þegar þeir lýstu yfir andúð sinni á myndinni.

Gjaldið fyrir menningarlega fjölbreytni er sumsje skylduáhorf á bláar geimverur.

2010-01-11T10:08:00.000Z

Sumum finnst Icesave henta illa fyrir þjóðaratkvæðagreiðslu. Sem jeg skil alveg. En öll mál henta illa fyrir þjóðaratkvæðagreiðslu út frá þeirri lógík. Ættu menn þá ekki að vera á móti þjóðaratkvæðagreiðslum?

Og jafnvel enn skemmtilegra: Hefði Vigdís Finnbogadóttir neitað að skrifa undir EES-lögin ef ekki hefði verið gert ráð fyrir að boðnir yrðu árlega út tollkvótar fyrir norskar kartöfluflögur?

2010-01-07T12:20:00.000Z

Það ber óneitanlega vott af hræsni að vera andstæðingur forsetans núna á grundvelli þess að hann er að endurskrifa íslenska stjórnskipan. Hann hefur jú verið að frá 1996.

2010-01-07T12:17:00.001Z

Núna er rétti tíminn fyrri sús og heimdall að álykta um sölu áfengis í matvöruverslunum.

2010-01-07T12:08:00.002Z

Hvað þýðir það þegar veitingarstaðir bjóða upp á eitthvað heimalagað? Eru þá kokkarnir búnir að útbúa matinn heima og koma með hann í vinnunna? Er það ekki andstætt góðum hollustuháttum?

2010-01-06T13:41:00.000Z

Keisarinn er ekki í neinum fötum. Af hverju virðist það þykja eðlilegt að alþjóðleg matsfyrirtæki byggi greiningu á stjórnarmálalegri áhættu á greiðslufalli á því að tiltekin lausn fáist vegna Icesave? Hafa ekki öll skuldabréf íslenska ríksisins og fyrirtækja og stofnana í eigu þess verið greidd réttilega um árabil? Og er telur einhver að breyting verði þar á í náinni framtíð?

Já Fitch telur að svo sé af því að íslenska ríkið vill ekki samþykkja tiltekinn Icesave samning!

2009-12-15T21:23:00.001Z

Nú er jeg búinn að velta þessu fyrir mjer í tvo sólarhringa eða eitthvað. Maður festir varla svefn. Og jeg hef komist að niðurstöðu.

Það er bara algerlega útilokað að kylfusveininn hans hr. Woods hafi ekki vitað af framhjáhaldinu. Útilokað.

2009-12-14T09:41:00.000Z

Það verður æ vandræðalegra fyrir ríkisstjórnina hvernig hún bakkar með mál eftir smá mótmæli. Meira að segja einmana refaskyttur geta valdið stefnubreytingu. Ef ekki verður meira skorið niður spái jeg því að samhliða fjárlögum fyrir árið 2011 verði lagðar til umfangsmiklar skattahækkanir.

2009-12-12T22:01:00.002Z

Jeg skil ekki þetta stöðuga daður RÚV við mögulegar skaðabótakröfur á hendur fyrrum bankastjórum. Það er nákvæmlega ekkert sem bendir til þess að grundvöllur sé fyrir slíkum kröfum. Þar til það breytist er ekkert fréttnæmt á seyði. Ekkert.

2009-12-11T13:16:00.000Z

Það er nokkuð athyglisvert að sumir fjölmiðlar skuli fjalla um framhjáhald Tiger Woods með íþróttafréttum. Með sambærilegum rökum ætti núverandi ríkisstjóri Kalíforníu líklega að vera í slúðurdálkunum.

Að sama skapi er það forvitnilegt hversu jákvæð formerki eru gjarnan á umfjöllun um hr. Woods. Ekki alls fyrir löngu var starfsmaður KSÍ á vafasömum næturklúbb sem þótti til vansa fyrir alla íþróttahreyfinguna. Af hverju fær hr. Woods ekki sömu siðferðilegu fordæminguna í fjölmiðlum fyrir ítrekað framhjáhald sitt og vafasama lyfjanotkun fyrst það er verið að fjalla um einkamálefni hr. Woods á annað borð?

Starfsmaur KSÍ gat þó afsakað sig með tímabundnu dómgreindarleysi og drykkju (hversu góð sem sú afsökun er).

Í minningunni var framhjáhald þáverandi Bandaríkjaforseta hr. Clintons mikið fordæmt. Jeg á hálfbágt með að skilja menningu samtímans.

2009-12-08T09:54:00.000Z

Woods hefur ekki farið leynt með, að hann hafi tekið sterk verkjalyf milli golfmóta. Nú velta bandarískir fjölmiðlar því fyrir sér hvort sambland af þessum tveimur lyfjum hafi leitt til einskonar kynferðislegs ójafnvægis sem síðan hafi valdið því að Woods hegðaði sér eins og raun virðist bera vitni.
- mbl.is

Nú hef jeg stundum tekið parkódín sjálfur og þekki vel það hvernig verkjalyf valda kynferðislegu ójafnvægi. Í því ljósi og vegna þess að Tiger er drengur sem raunverulega vill vel er rjett að afsaka þessa hegðun hans og horfa oftar á golf í sjónvarpinu.

2009-12-07T08:45:00.001Z

Nú er í tízku að fjalla um Tiger Woods. Getur þessi ágæta bloggsíða ekki látið sitt eftir liggja í þeim efnum. Það er augljóst að Tiger Woods giftist Elin Nordegren bara af því að hún er ljóshærð dóttir fyrrum sænsks ráðherra. Blökkumenn hafa verið undirokaðir í aldir og með þessum ráðahag nær hr. Woods fram hefndum. En það dugir skammt (eins og mörkin tvö í 14-2 leik bauna og molbúa) og þá heldur hann framhjá. Þannig nær hr. Woods sér niður á hvítu karlægu valdakerfi síðkapítalísks samfjelags.

Gægjufýsn heimsbyggðarinnar er hins vegar algerlega óskiljanleg.

2009-12-06T21:23:00.000Z

Ætli það megi ekki taka undir það með ÓRG að Obama skorti reynslu. Þrátt fyrir að hafa verið forseti í áratug sá ÓRG jú ekki í gegnum útrásarmennina sem misnotuðu hann svo illa.

2009-12-05T13:26:00.000Z

Alltaf skal jeg heyra auglýstan einhvern kröfuhafafund á Austurvelli.

2009-12-05T09:50:00.000Z

Auðlegðarskattsálagningu eftirlifandi maka eða sambúðaraðila, sbr. 3. mgr. 62. gr., sem situr í óskiptu búi skal hagað á sama hátt og um hjón væri að ræða í mest fimm ár frá andlátsári hins látna, þó ekki fram yfir gildistíma þessa ákvæðis, enda hafi viðkomandi ekki hafið sambúð að nýju.
- e-liður 25. gr. frumvarps um skattahækkanir in fine

Nú er auðvitað átt við að ekkjan eða ekkilinn hafi tekið saman við einhvern nýjan ekki að hinn látni hafi risið upp frá dauðum.

2009-12-03T11:23:00.001Z

Það er nokkuð skemmtilegt að gera vanilluhringi með þar til gerðu járni. Jeg gæti jafnvel hugsað mjer að henda í annan skammt. Jólakökubakstri þessa árs er samt lokið.

2009-12-02T14:40:00.001Z

Jeg ætla rjett að vona að Andri Snær eigi stóra arinhillu.

2009-12-02T09:44:00.001Z

Af hverju hlusta tannlæknar á Bylgjuna?

2009-11-21T13:07:00.000Z

Það er augljós líkindi með merki HSBC og Arion banka. Altso þessir skemmtilegu þríhyrningar.

2009-11-20T08:52:00.000Z

Nú þegar búið er að velja flæmskan hagfræðing til þess að gegna embætti forseta Evrópu í bakfylltu reykherbergi er einni spurningu enn ósvarað. Var ákvörðunin tekin við kvöldverðinn eða var liðið byrjað að gæða sjer á konjakinu?

2009-11-19T09:37:00.002Z

Man einhver eftir því þegar það var talið mjög mikilvægt að klára Icesave fyrir 23. október?

2009-11-18T14:15:00.002Z

Maður kemst ekki hjá því að hugsa, jafnvel um fólk sem er með doktorspróf, að það sje fíbbl ef það bloggar á blogcentral.

Ekki þar fyrir, doktorpróf veita enga sjerstaka vernd gegn fíbblaskap og vitleysisgangi.

2009-11-10T22:20:00.000Z

Jeg er ennþá að jafna mig eftir að hafa komist að því að Rapid Vín getur státað af þýskalandsmeistaratitli. Að hugsa sjer ef það væri nú einn Danmerkurmeistarabikar í skápnum hjá káerr. Já eða Kalmarsambandsmeistaratitill.

Annars veltir maður því fyrir sjer hvað verður um neikvæðu bókagagnrýnina. Eins og dæmin sanna er hin jákvæða vel geymd (sem er í mörgum tilfellum skrifuð af vinum höfundarins). Er neikvæð gagnrýni bara ávísun á að allir gleymi því sem maður sagði? Nema e.t.v. hörundssárir höfundar sem bera kala til viðkomandi ritdómara alla ævi.

Það er altjent vízt að eina neikvæða gagnrýnin sem jeg er líklegur til þess að heyra um tilvísaða bók var í Víðsjá í dag. Rýnirinn sagði hana ömurlega.

2009-11-10T09:31:00.000Z

Það var agaleg gagnrýni á hann Robbie minn Williams í mogganum um daginn. Nú er jeg farinn að hafa áhyggjur af því að hinn ómálefnalegi ritstjóri mogganns sem allir óttast sje farinn að skipta sjer af tónlistarrýninni. Þá yrði Raggi Bjadna einn um að fá góða dóma.

2009-11-07T21:28:00.000Z

Mjer finnst það soldið krúttlega þegar Bókasýningin í Frankafurðu er nefnt Bókamessan í Frankfurt. Það er svo freistandi að íslenska messe ekki neitt. Sjer í lagi þegar það dregur úr vörusýningarbrag sýningarinnar. Það er andstætt eðli bókmennta sem menningarfyrirbæris að tala um vörusýningu.

Það er hins vegar lítið varið í það að kalla allar sýningar messur. Það er bara leiðinda þýskusletta.

2009-11-06T16:56:00.000Z

Ólafur Páll Jónsson talar um það í Skírni að Alþingi þurfi að spítta í lófana og gera eitthvað af viti. Meirihlutinn ekki bara að neita aflsmunar og þingmenn ekki að sætta sig við það að rök skipti engu máli.

Eitthvað rámar mig nú í það að hafa haldið því sama fram en aukinheldur hafnað því að að það væri hægt. Nútíminn er bara svo slakur.

Sú kenning að núveranda kreppa sje einhvern veginn skorti á lýðræði að kenna finnst mjer að mörgu leyti vafasöm. Ef við eigum við það að meira mas hefði bjargað málinu þá er það líklega kolrangt. Gagnlítið þing, handónýtir fjölmiðlar og fávís, firrt alþýðan hefði engu bjargað.

Út frá þessu sjónarhorni væri eðlilegra að halda því fram að minna lýðræði hefði gert þetta skárra.

2009-11-03T12:48:00.002Z

Jeg hvet Streingrím Jóhann og Jóhönnu til þess að lýsa yfir einhverju fáránlega blaðurslegu á næsta blaðamannfundi og sjá hvort það komi ekki í hádegisfrjettum rúv. Þau gæti t.a.m. lýst því yfir að þau sjeu á móti gróðurhúsaáhrifum eða að þeim þyki vænt um börn.

2009-11-02T22:55:00.002Z

Verða menn meira brjálaðir yfir barnalánum en kynferðisafbrotum gegn börnum?

2009-10-29T16:00:00.000Z

Maður hefur ekki heyrt rúv fjalla jafn mikið og með jafn jákvæðum hætti um nokkurn sjálfgræðismann í lengri tíma og hann Ólaf heitinn Thors. Í sjálfu sjer er það vel skiljanlegt. Fyrir utan það að eðlilegt hefði verið að fagna hinum nýja ritstjóra Morgunblaðsins.

Nú er jeg hrekklaus að eðlisfari en jeg get ekki varist þeirri tilhugsun að allur spuni, lygar og ómerkileg áróðursbrögð hvort heldur sem er í fjölmiðlum eða á lýðnetinu hafi aukist um allan helming síðastliðið árið.

Sjái maður ekki í gegnum spunann og vill ekki verða heilaþveginn er líklega eina leiðin að lesa bara Ferdinand og hlusta bara á útvarpssöguna.

2009-10-28T15:44:00.001Z

Jeg bíð spenntur eftir því að rúv segi landslýð af líðan svínanna sem eru með svínaflensu. Hversu lengi skyldu þau nú vera að ná sjer? Og ætli það sje mikið nefrennsli? Það hlýtur að vera, þau eru með svo stór trýni.

2009-10-22T10:20:00.000Z

Fast skotið hjá Ögmundi í gær á ASÍ og önnur stjettarfjelög sem eru of kósý með atvinnurekendum. Gaman.

Og jafnvel enn fastar skotið frá forsetanum á egil helgason í spjallinu með sölva. Missti frontinn. Gaman.

2009-10-21T23:57:00.000Z

Nýr sjávarútvegsráðherra í Noregi var kynnt sem vinkona Rökke á rúv. Mjög skemmtilegt. Sje fyrir mjer að í næsta frjettatíma hljómi eitthvað í líkingu við: "já og Jón Bjarnason hefur bara einu sinni hitt Þorstein Má og þeir töluðu ekki einu sinni saman."

Annars er gaman að lesa í mogganum um hörmungarnar sem dynja munu yfir Ísland þegar Icesave verður samþykkt og opna svo fyrir viðtækið og heyra rúv útskýra af hverju stjórnarandstaðan ætti að lyppast niður í Icesave málinu. Það var svo hræðilega leiðinlegt þegar allir fjölmiðlarnir vildu bara ganga í esb.

2009-10-21T11:25:00.001Z

Það er segin saga að skömmu eftir að fjallað er um vændi í fjölmiðlum sjer maður einhvern andæfa tilvist hamingjusömu hórunnar. Jeg reyndar missi alltaf því þegar reynt að styðja tilvist hennar. En hvað um það, hefur umræðan um vændi ekkert þroskast?

Og er til leiðinlegra hjólfar t.þ.a. detta í?

2009-10-10T16:03:00.002Z

Jaaá. Leif var norsk.

2009-10-10T09:43:00.001Z

Obama á Norðurlöndum, spennandi þættir um æfintýri forseta Bandaríkjanna á ferðum hans um Scandinavíu. Fylgist með frá byrjun.

2009-10-06T21:41:00.001Z

Er það ekki til marks um trú mína á mannkynið að jeg skuli gera ráð fyrir því að fólk bremsi ekki á grænu ljósi?

2009-10-06T15:39:00.001Z

Þegar jeg var lítill fannst mjer gufan alveg vonlaus af því að það var svo mikið af sinfóníum og svoleiðis á henni. Samtímarannsóknir mínar hafa hins vegar leitt í ljós að rásareittmenn hafa sjerstakt dálæti á djassi. Það mætti jafnvel ganga svo langt að halda því fram að þar á bæ sjeu menn haldnir einstöku djassblæti.

2009-10-04T13:52:00.001Z

Þvílík hrákasmíð er þetta fjárlagafrumvarp. Aðallega vegaframkvæmdir skornar niður og skattar hækkaðir á einstaklinga. Þetta lýsir nú ekki beinlínis hugmyndaauðgi, yfirlegu, útsjónarsemi, ráðdeildarsemi eða skynsemi.

2009-10-03T22:26:00.000Z

Ótrúlega slappt af Obama að eyða öllu pólitíska kapítalinu sínu í að Olympíuleikarnir yrðu í Chicago. Það er farið að líta út sem hr. Obama muni takast lítið af því sem hann ætlaða að gera.

2009-09-24T22:07:00.000Z

Það væri gaman að vita hvað gert er á þessum ritstjórnum. Jeg sje ekki alveg fyrir mjer að hundrað manns geti ritstýrt saman.

2009-09-22T22:10:00.000Z

Til þess að gera landslýð alveg trítilóðann legg jeg til að Hannes Gissurarson verði gerður að aðstoðarritstjóra aðalritstjórans Davíðs Oddssonar.

Þá yrði sko líf í tuskunum.

2009-09-20T00:30:00.000Z

Stuttu eftir að jeg sendi letters bréf til Morgunblaðsins í hverju jeg tilkynni uppsögn áskriftar minnar er ristjóranum sagt upp. Þetta getur ekki verði tilviljun.

Og fyrst minnst er á menningarsöguleg áhrif mín má láta þess getið að hugmyndir mínar virðast hríslast hægar um þjóðfjelagið eftir að jeg byrjaði í fæðingarorlofi. Það skyldi þó aldrei vera að drengurinn sje ótalandi ennþá.

2009-09-16T22:45:00.000Z

Nú má halda því fram að sérfræðivæðing peningamála hafi ekki beinlínis slegið í gegn, hvorki hjer á landi nje annars staðar. Að leyfa stjórnmálamönnum að ráskast með fjármálastefnuna hefur hins vegar almennt gengið illa. Það er því rjett að velta því fyrir sjer hvort það sje ekki nauðsynlegt að sérfræðivæða fjármálastefnu ríkisins.

2009-09-16T00:44:00.000Z

Því hefur verið haldið fram að fjármálaeftirlit víða í heiminum hafi farið þannig fram að opinberir starfsmenn hafi gefið til kynna hvað þeir vildu og að eftirlitsskyldir aðilar hafi jafnan hagað sjer þannig. Með því mátti forða nánari rannsókn með tilheyrandi kostnaði. Nú er ljóst að sú aðferðafræði gengur á svig við ýmsar hugmyndir um málefnalega og eðlilega stjórnsýslu. Þó að fyrirkomulagið sé vissulega praktískt. Reyndar hefur maður heyrt því haldið fram að íslenska Fjármálaeftirlitið hafi iðkað öllu lögbundnari stjórnsýslu.

Nú hafa að því er virðist þrír af fimm mönnum í nefnd sem metur fjárfestinga erlendra aðila sent frá sér fréttatilkynningu um að nefndin hyggist rannsaka eitthvað sem vill svo til að er í fréttum. Svo skemmtilega vill til að fréttatilkynningin og annað kemur frá þekktum vaffgje liðum en samstarfsmenn í borgarstjórn hafa svo hent þetta á lofti. Frjettatilkynningin lítur að því að hugsanlega sé andi laganna brotinn.

Vitaskuld má halda því fram að með því að stjórnvöld framfylgi í hvert eitt sinn anda laganna sé framfylgd þeirra í samræmi við tilgang og markmið hverra laga þannig bezt tryggð. Eftir því sem lengra er gengið er hins vegar hugmyndum réttarríkisins um fyrirsjáanleika og réttaröryggi hafnað af meiri krafti. Jafnframt kemur að þeim punkti að stjórnsýslan er hætt að vera lögbundin og þar með hoggið nærri grundvallarstofnunum lýðræðisins.

Nú hefur maður alla samúð með þeim sem vilja túlka lög eftir anda þeirra og jafnvel láta hann ráða. En bindislausa fólkinu á alþingi getur varla munað mikið um að breyta lögum sem ekki gera sitt gagn.

2009-09-14T21:35:00.000Z

Í lögum um fjárfestingu erlendra aðila í atvinnurekstri nr. 34/1991 segir svo í 2. tl. 1. mgr. 4. gr.:

"Íslenskir ríkisborgarar og aðrir íslenskir aðilar mega einir eiga virkjunarréttindi vatnsfalla og jarðhita önnur en til heimilisnota. Sama á við um fyrirtæki sem stunda orkuvinnslu og orkudreifingu. [Sama rétt hafa einstaklingar sem búsettir eru í öðru aðildarríki samningsins um Evrópska efnahagssvæðið, öðru aðildarríki stofnsamnings Fríverslunarsamtaka Evrópu eða Færeyjum og lögaðilar sem heimilisfastir eru í öðru aðildarríki samningsins um Evrópska efnahagssvæðið, öðru aðildarríki stofnsamnings Fríverslunarsamtaka Evrópu eða Færeyjum.]1) Heimilt skal að kveða svo á í fjárfestingarsamningum milli Íslands og ríkja utan Evrópska efnahagssvæðisins að einstaklingar sem þar eru búsettir eða lögaðilar sem þar eru heimilisfastir hafi einnig sama rétt, enda verði slíkir samningar lagðir fyrir Alþingi til staðfestingar með þingsályktun."

Það er sumsje kýrskýrt að félag skráð í Svíþjóð má eiga innlent orkufjelag. Af hverju RÚV nennir að gera frjett um annað er furðulegt. Nema sem áróðursbragð.

Svo þykir fínt í dag að tala um að eitthvað sje andstætt anda laganna. Það væri hressandi ef dómstólar gætu nú dæmt menn til þess að gera hitt og þetta og láta annað ógert byggt á anda laganna. Þá mætti reyndar stöðva alla erlenda fjárfestingu á Íslandi enda er andi laga um fjárfestingu erlendra aðila í atvinnurekstri almennt frekar neikvæður í garð útlendinga.

2009-09-11T12:44:00.002Z

Jeg er enn að huxa um viðtalið á Rás 1 í gær við konuna sem sagði blómadropa geta laðað fram innri heilarann í hverjum manni. Ef jeg skil þetta rjett þá getur maður bara læknast sjálfur af ýmsum kvillum.

Reyndar með aðstoð blómadropa.

2009-09-07T17:16:00.002Z

Að klippa neglurnar þegar maður er nýbúinn að ryksuga getur verið afar taugatrekkjandi.

2009-09-06T22:34:00.002Z

Ætli Ögmundur Jónasson leiti ekki bara á náðir smáskammtalækninga og heilara til þess að spara í heilbrigðiskerfinu? Með fjarheilun má m.a.s. lækna alla Íslendinga án þess að nokkur þurfi að fara út úr húsi. Og spara milljarða í leiðinni.

2009-09-01T11:57:00.001Z

Af einhverjum ástæðum þykir ýmsum sem Michael Jackson sje afturliðinn.

2009-08-20T21:14:00.002Z

Svona eins og til þess að undirstrika það að nýtt leikár Borgarleikhúsins verði áræðnara og djarfara en það síðasta var Magnús Geir leikhússtjóri með kragan skakkann á myndinni af sjer. Eins konar teaser enda var bara kynnt að kynna ætti dagskrá leikhúsins á morgun.

2009-08-19T13:23:00.001Z

Líklega er þetta sviðsett mynd hjá mbl.is þó að það komi ekki fram. En það gefur auga leið að með viðlíka sleifarlagi verða engin innbrot framin.

2009-08-14T12:58:00.002Z

Þá hefur Þráinn Bertelsson tekið fyrsta skrefið í áttina að samfylkingunni. Menn eru ekki á eitt sáttir um fjölda enna í nafninu hans.

Ætli það þurfi grein frá Hjörleifi áður en við áttum okkur á því að ISG er á móti Icesave? Það hefði nú verið gaman að sjá hana og DO standa saman á fundinum í gær.

2009-08-12T10:04:00.002Z

Þessi samantekt Seðlabankans er ágæt. Það vekur samt furðu mína hvað frjettatilkynningin og upphafið ríma illa við efni skýrslunnar að öðru leyti. Það er mjög skemmtilegt hvernig Seðlabankinn tekur ekki afstöðu til afnáms verðtryggingar en færir mjög sterk rök gegn því. Jafnframt er gagnrýni á stjórnun ríkisfjármála undanfarinna ára eins og talað út úr mínu hjarta.

Sem vekur upp þá spurningu hvort lýðræði komi í veg fyrir skynsamlega fjármálastefnu ríkisins?

2009-08-11T11:39:00.002Z

Það er mikið hægt að bísnast yfir morgunvakt Rásar 2. Eftir skítsæmilegt við tal við Bjarna Ben í morgun var þannig rætt við talnaspeking sem merkilegt nokk sagði að ýmislegt, bæði gott og slæmt, ætti eftir að gerast erlendis í framtíðinni. Og það má ráða af tölunni 11 sem einkennir þetta ár.

Maður kemst alveg úr jafnvægi þessa morgna sem viðtækið er á vitlausri rás.

2009-08-06T21:00:00.002Z

"Þeir sem urðu varir við manninn við Hlyngerði í nótt eru beðnir um að hafa samband við lögreglu"
- mbl.is í frjett um málningarskvettur á heimili Hreiðars Más

Ef vitað er um bílinn ætti að vera hægur vandi að bera saman Opel Vectra eigendur og málningakaupendur (nema greitt hafi verið með reiðufé). Það ætti altjent að vera auðvelt að finna sökudólginn. Þessi frjett er svolítið eins og auglýsing á aðsetri HMS. Allir að henda málningu í húsið hans!

Og talandi um frjettir þá setti RÚV viðskiptavini Innheimtustofnunar sveitarfélaganna og viðskiptavini Kaupþings banka undir sama hatt í frjett um æsta skuldara. Það er fulllangt gengið þegar manni er líkt við meðlagsskuldara. Mann grunar að rúv-liðar viti ekki hvað Innheimtustofnun sveitarfjelaganna geri. Hún notast þó við lénið www.medlag.is.

2009-07-28T21:22:00.001Z

" Þá hef ég óskað eftir því við lögmann minn að hann kanni stöðu mína í því flóði skipulagðs óhróðurs, véfrétta og lyga sem vef- og fjölmiðlar á Íslandi hafa tekið að sér að dreifa um mig og fyrirtæki mín."
- bein tilvísun í frjettatilkynningu Björgólfs Thors af mbl.is

Þær eru agalegar þessar véfrjettir. Jeg man sjerstaklega eftir einni í Delfí sem var ansi hvimleið.

2009-07-28T17:40:00.000Z

Miðborgin er full af villtum Þjóðverjum.

2009-07-13T14:45:00.002Z

Ætli greinin sje svona vinsæl af því að allir skemmta sjer við að hlæja að blaðamanninum eða ætli lesendur vísis sje svo skini skroppnir að halda að það sje eitthvað vit í þessu?

Jeg reyndar las þetta bara af því að fyrirsögnin lofaði góðu. Eftir lesturinn er maður hins vegar sannfærður um að best sje að halda áfram að sneiða framhjá "frjettavefnum" vísir.is.

2009-07-07T11:56:00.002Z

„Nefndin naut einnig aðstoðar lögmannsstofunnar Mischon de Reya í London“
- grg. með Icesave frumvarpinu

Nei nei, við erum ekkert að segja frá því hvað stofan sagði. Nei nei, það er ekki svo merkilegt. Opið, nútímalegt og faglegt samræðulýðræði?

„Ný samninganefnd – Ný nálgun“ segir á Ísland.is um málið. Nýja nálgunin fólst í algjerri uppgjöf. Sjerstök taktík.

2009-07-02T09:59:00.002Z

„9. Því miður hefur skort samhljóminn sem þarf að vera milli þings og þjóðar í svo mikilvægu máli. Fjölmiðlarnir eru sá hornsteinn í lýðræðisskipan og menningu okkar Íslendinga að ekki er farsælt að varanlega verði djúp gjá milli þingvilja og þjóðarvilja. Slíka gjá þarf að brúa.
10. Það verður best gert með því að þjóðin fái í hendur þann rétt sem henni er veittur í stjórnarskrá lýðveldisins og meti lagafrumvarpið í þjóðaratkvæðagreiðslu.“
- Yfirlýsing forseta Íslands 2. júní 2004

Líklega hefur forsetinn ekki búast við því að til þess kæmi en ef hann vill gæta samræmis verður hann líklega að synja Icesave samningunum um staðfestingu. Eini munurinn á þessum málum er sá að fjölmiðlar JÁJ og aðrir eru ekki dýrvitlausir á móti.

2009-06-16T10:39:00.002Z

Einhvern veginn rataði jeg inn á grein um daginn í FT sem var efnislaga á þá leið að verðin sem greidd væru fyrir knattspyrnumenn væru undarleg og að lítið viðskiptavit væri í ákvörðunum knattspyrnuliða hvað það áhrærir. Nema hvað líta mætti á þetta allt saman sem standpínukeppni.

Það kannski virðist skorta viðskiptavit af því að klúbbar græða ekki neitt. Græði þeir eitthvað eyða þeir öllum hagnaðnum í að ganga betur. Það má því kannski líta á klúbba sem fyrirtæki sem vilja hámarka verðmæti sitt en afkoman þarf bara að vera u.þ.b. núll yfir langan tíma. Í því ljósi er mikið vit í því að borga svimandi upphæð fyrir Ronaldo. Hann er vinsæll og frægur, selur treyjur og trekkir að á völlinn. Mjer segir jafnvel svo hugur að Real Madrid geti hækkað miðaverðið um a.m.k. 5 júrur með Kaka og Ronaldo innanborðs. Fyrir utan treyjusöluna og auknar vinsældir vörumerkisins Real Madrid.

Eins ósanngjarnt og það nú er borgar sig fáir inn t.þ.a. sjá góða varnarmenn. Ef draumur púlarans um heilt lið af Carragherum rættist er þannig ólíklegt að það hafði jákvæði áhrif á tekjustreymið. Til þess þyrfti heilt lið af Torresum.

Og af því að áhangendur meta litríka leikmenn umfram agaða og markaskorara umfram varnarmenn verðum við að sæta því að fríðleikspiltar sem hafa slæmt siðferði en kunna að gera skæri og skora beint úr aukaspyrnum seljist dýrum dómum.

En með því er maður auðvitað ekki að verja kaupverðið siðferðilega.

2009-06-12T16:01:00.003Z

Þegar jeg var lítill var svo augljóst hver var dýrasti knattspyrnumaður í heimi. Núna er pundið svo veikt að Kaka er númer tvö í evrum en eitt í pundum. Líklega er þetta besti tíminn t.þ.a. kaupa Ronaldo út frá þessu gengissjónarmiði. Það fást svo mörg pund fyrir evruna. En eins og verðbrjevasjóðirnir minna á í auglýsingum (og samtíminn hefur fært okkur heim sanninn um) þá er fortíðarframmistaða engin ávísun á framtíðarframmistöðu. Ronaldo verður líklega aldrei verðmeiri en eftir nýleg afrek sín.